پشاور: شور مچانے پر چچا نے کمسن بھتیجی کو گولی مار کر قتل کردیا

اسلام آباد (قدرت روزنامہ)صوبہ خیبر پختونخوا کے دارالحکومت پشاور میں ایک شخص نے کھیل کے دوران شور مچانے پر غصے میں اپنی بھتیجی کو گولی مار کر قتل کردیا . 22اپریل کو بچی کے والد کی مدعیت میں درج کی گئی ایف آئی آر کے مطابق پشاور کے علاقے تہکال میں 48سالہ مشتبہ ملزم کو گھر کے باہر کھیلنے والے بچوں کے شور مچانے پر غصہ آ گیا .

ضرور پڑھیں: پشاور میں سی ٹی ڈی کا آپریشن، 4 دہشت گرد ہلاک

شکایت گزار کے مطابق ملزم نے پہلے گالم گلوچ کی اور پھر اپنا پستول نکال کر بچوں پر فائرنگ کردی جس کے نتیجے میں اس کی بھتیجی زخمی ہو گئی. 7سالہ بچی کو فوری طور پر ہسپتال منتقل کیا گیا لیکن وہ راستے میں ہی دم توڑ گئی. تہکال پولیس اسٹیشن کے محرر شاداب جاوید نے ڈان نیوز سے گفتگو کرتے ہوئے بتایا کہ ملزم مقتولہ بچی کے ساتھ ایک ہی عمارت میں دوسری منزل پر رہائش پذیر تھا اور اس کی شادی نہیں ہوئی تھی. انہوں نے بتایا کہ ملزم مفرور ہے اور پولیس واقعے کی تحقیقات کر رہی ہے.

انہوں نے کہا کہ ایف آئی آر اور پولیس کی ابتدائی تفتیش سے یہ معلوم ہوتا ہے کہ ملزم نے بچوں کے شور مچانے پر فائرنگ کی جبکہ پولیس واقعے کی مزید تحقیقات کر رہی ہے. جب ان سے ملزم کی ذہنی حالت کے بارے میں پوچھا گیا تو انہوں نے کہا کہ اہلخانہ کے مطابق ملزم کو کسی بھی قسم کا ذہنی مسئلہ نہیں تھا جبکہ ابتدائی تفتیش سے معلوم ہوا ہے کہ بھائیوں کے درمیان بھی کسی قسم کا تنازع نہیں تھا.

..

ضرور پڑھیں: پشاور،کورونا وائرس سے متاثرہ خیبرپختونخوا کے صحافی فخرالدین سید انتقال کرگئے


Top